විදේශ රැකියා රටට ආදායම් උපයා දෙන ප්රධාන මාර්ගයකි. එය රටට විදේශ විනිමය උපයා දෙන ප්රධාන මාර්ගය ලෙස ක්රියාකරනවාට අතිරේකව රටේ රැකියා විරහිත ප්රශ්නයේ බර අඩු කොට ග්රාමීය දුප්පත්කමේ බර සැහැල්ලු කිරීමට හේතුවී තිබෙන ප්රධාන මාර්ගයක් ලෙසද සැලකිය හැකිය.
විදේශීය ආයෝජන හෝ සංචාරක කර්මාන්තයට ලබාදී තිබෙන වැදගත්කම තරම්ම වැදගත්කමක් මෙම අංශයට ලැබිය යුතුව තිබේ. ගෘහ සේවිකාවන් රට යවන ප්රතිපත්තියෙන් ක්රමානුකූලව ඉවත් වී පුහුණු සේවිකාවක් රට යැවීමට බර තබන ප්රතිපත්තියකට රට මාරුවිය යුතුය.
විදේශ රැකියා සඳහා රට යන අයගෙන් සුළු පිරිසකට විවිධ කරදරවලට මුහුණ දෙන්නට සිදුවීම සැලකිය යුත්තේ අසාමාන්ය තත්ත්වයක් ලෙස නොව, සාමාන්ය තත්ත්වයක් ලෙසය. නරක ආයතනයක හෝ ස්වාමියකු ළඟ සේවය කරන්නට සිදුවන අවස්ථාවකදී එවැනි තත්ත්වයන්ට මුහුණදීමට සිදුවිය හැකිය. එහෙත් ස්වාමි පක්ෂයේ සියලු දෙනා හෝ සේවය කරන්නට සිදුවන සියලු ස්ථාන නරක ලෙස සැලකිය නොහැකිය. විදේශ රැකියා සඳහා යන අය අතර තමන්ගේ වැරදි නිසා ප්රශ්න ඇතිකර ගන්නා අවස්ථා ද පවතී. විශේෂයෙන් ගෘහ සේවිකාවන් පිළිබඳ ප්රශ්නයේදී ගෘහ සේවිකාවක් සොයා දෙන පුද්ගලයන්ට එක් අයකු සඳහා රුපියල් 80,000ක් ගෙවනු ලබයි. සිය බිරියන් රට යවන සමහර ස්වාමිපුරුෂයෝද එම ගෙවීම ලබා ගනිති. එම ගෙවීම ලබාගෙන බොරු චෝදනා ඉදිරියට ගෙන සිය බිරියන් මාසයකට අඩු කාලයකදී ආපසු ගෙන්වා ගන්නා අවස්ථාද පවතී. එය ජාවාරමක් ලෙස සැලකිය හැකිය. විදේශ රටවල රැකියාවලට යන අය අතර අවුල් ඇති කරන්නෝද සිටිති. මේ තත්ත්වයේ යම් පාලනයක් තිබිය යුතුය. නරක ඒජන්සිකරුවන් අසාධු ලේඛනයට ඇතුළත් කරන ආකාරයට එවැනි ශ්රමිකයන්ගේ නම් ද අසාධු ලේඛනයට ඇතුළත් කරන වැඩපිළිවෙළක් ආරම්භ කරන බව විදේශ රැකියා ප්රවර්ධන ඇමතිවරයා ප්රකාශ කර තිබේ. විදේශ රැකියාවලට යන්නන්ගේ ගුණාත්මකභාවය සහතික කිරීම සඳහා එවැනි ක්රමයක් ඇති කිරීම ඉතා වැදගත්ය.
එසේම විදේශ රැකියා ඒජන්සිකරුවන් කෙරෙහි ද යහපත් ආකල්පයෙන් ක්රියාකරන ප්රතිපත්තියක් ඇතිකර ගැනීම අවශ්යය. ඔවුන් මෙම විෂයෙහි ආදායම් උපයනවා වුවත් ඔවුන් අතින්ද රටේ ආර්ථිකයට යහපත් හා වැදගත් කාර්යභාරයක් ඉටුවේ. ගෘහ සේවිකාවන් වෙනුවට පුහුණු ශ්රමිකයන්ට බර තබා ක්රියාකරන ප්රතිපත්තියකට ඔවුන් යොමු කළ යුතුය. ඒ සඳහා ඔවුන් දිරිමත් කරන හා පොළඹවන ක්රමයක් තිබිය යුතුය.
විදේශ ශ්රම වෙළෙඳපොළේදී මැලේසියාව ශ්රී ලංකාවේ ශ්රමිකයන්ට විවෘත වී තිබෙන අලුත් ශ්රම වෙළෙඳපොළක් ලෙස සැලකිය හැකිය. මැලේසියාව වැදගත් වනුයේ එය නවීන කර්මාන්තවලින් යුතු රටක් වන නිසාය. මැලේසියාව උනන්දුවක් දක්වන්නේ ෆැක්ටරි සේවකයන්ටය. සෝනි, හුන්ඩායි වැනි නවීන කර්මාන්තශාලාවලට ශ්රමිකයන් යැවීම මගින් අපට ඔවුන් පුහුණු ශ්රමිකයන් බවට පත්කළ හැකිය. ඔවුන්ට බොහෝ විට වැඩ කරන්නට සිදුවන්නේ දියුණු කර්මාන්තශාලාවලය. එවැනි කර්මාන්තශාලාවක වසර කිහිපයක් වැඩ කරන පුද්ගලයකුට විශේෂ කර්මාන්ත කාර්යයක් සඳහා පුහුණුවක් ලැබෙන අතර එවැනි ශ්රමිකයකු වැඩ කිරීමේ පළපුරුද්දක් ඇති නාමධාරී ආයතනයක වැඩ කර ඇති බවට සහතිකයක් ඇති පුහුණු ශ්රමිකයකු බවට පත්වන්නේය. ඉන්පසු පුහුණු ශ්රමිකයන් ඉල්ලා සිටින වෙනත් දියුණු රටකට වුවද රක්ෂාවට යා හැකිය.
මේ වසරේ මැලේසියාවට අවශ්ය විදේශ ශ්රමිකයන්ගේ ගණන ලක්ෂයක් පමණ වන බව කියනු ලැබේ. මෙම ගණනින් කිසියම් විශාල පංගුවක් හිමිකර ගැනීමට ශ්රී ලංකාව උත්සාහ කළ යුතුය. ඒ මගින් විශාල පිරිසකට රැකියා ලබාදෙන අතර විශාල විදේශ විනිමය ආදායමක්ද රටට උපායගත හැකිය. එයින් සිදුවන වැදගත්ම දේ අපේ වියදමකින් තොරව ශ්රමිකයන් කිසියම් විශාල පිරිසකට පුහුණුව ලබාදෙමින් ඔවුන් පුහුණු ශ්රමිකයන් පිරිසක් බවට පත්කිරීමට හැකිවීමය.
එහෙත් මැලේසියාවේ ශ්රී ලංකා තානාපති කාර්යාලයේ ක්රියාකාරකම් මෙම තත්ත්වයකට බලවත් බාධාවක් වී ඇති බව කියනු ලැබේ. ඒජන්සිකරුවන් පමණක් නොව, විදේශ සේවා නියුක්ති කාර්යාංශයද ඒ ගැන මවිත වන තත්ත්වයක් ඇති කිරීමට හේතුවී තිබෙන බවද අසන්නට ලැබේ. මැලේසියාවේ ශ්රී ලංකාවේ තානාපති කාර්යාලය මැලේසියාවට මිනිසුන් යැවීම ධෛර්යමත් කරනවා වෙනුවට අධෛර්යමත් කරන පිළිවෙතක් පවත්වාගෙන යන බව ද කියනු ලැබේ. ඒ තත්ත්වය ගැන සොයා බලා වරදක් ඇත්නම් වහා එය නිවැරදි කිරීම ආණ්ඩුවේ වගකීමකි.